INMUAN TANGAK

Naosen ga bacham se onge, nathot le sai
Inmuan khat za to ong, nasungle sai.
Nam jei sanu, kariangnu thot le phun,
Bariak teitei seswak le, thumrimnu nachong rai.

Ei ongta la hung-nge, ramsanu naka-ongriak
Inmuan tangaak to ong, o abaan kasanu,
Rin bachak soklan, banou lamnu namai kom.
Baniamga hung-nge eile napam, louthango
Ong nuam rwe inmuan la akum kasei
Inpaan seswak lat maklang,
Bangpui thango tipka banemnu nakariang na.

Ramrwan se ongnu katheirwan male nang inkuwe.
Ngai sai, saang-basa laa tonu,
Hama le nakhwan na thuk inkuwe.
Tamlet ka-ta basaangga barui kazangse,
Phaangsa inkuwe nalaam.
Eile inmuan se hanhung lat narwe, nariak sabi onglang.

Sunpha tabi nameiri ngai ga ongnuam me,
Zingpha tabi tamdi laam dingle ongcham ong-nge.
Bangeipui hungbi, inmuan katang luptuse! Naman phaang enlangna.

Sangmuan heichan, akum kasei, inmuan tangaak sanu ding ung bacham onglam re.

                           M. Riamroi
       
               
                         

Goodbye- My Dear Friends

                      Image: shot during 2007


Baning-nge, se bacham ongnu kaan

Karo-sa ga, kaluang se bariak bathin

Nang-arwei, meiri le Raicham thiruai sia hungbi

Kachui thang kali ongnu Avaanrwan,

Nating khwasei bacham onglang bakaan

Heina janah thang, vaan kasarwan no.


(Lozaanlo), vaan kasarwan ding katoinu bakaan lang.

Nachwan-achwan, tei hung re,

 Nariak-ariak le inpaan hung re.

Kakhan luga, sung riangre makjo,

Naluning le inpaan makka Ong ngo.

Bakaan khwasei ga Ani karung latlang je,

Nachwan-achwan kasa, phunlu inkunu

Karo-kaan Bina kadou lat jo.

Katoinu kanoi vaan kasarwan ding!


Baning-lo, asung changring Ong,

Nang-arwei naosen kumding, kadai Cham bariak bathin

Baniam-lo para pacham, school le secham.

Nang-arwei singthou-riak bathan satka

Seswak ke, namla nu ramla.

Bakaan na kaluang-lo, kapaang thangrwe vaanrwan no.


Kasanu ding kajap lo phunhung thango

Navaan eilin Kasia chwan banim ong-ga

Kadou latnu kaan jo, aninao, aniwa, 

Aninam, anichaat, kale thang rijo.

Adita, intun langbi hei kanoi thang-nge.

                               M. Riamroi