Bakalah thei makke to ongnu laa
Hwei ongnu hwei, bakungbi lam le.
Bakaan chat mak to ong ramram kala kabaang riri
Phaang thanglang le kala, bathem langle mimaak.
Nian Lamnu bakaan, khwa le zing hung dingrwe balaa ba chat mak ongmai
Balaa heiya seiye, bakungbi balan maakka ngai saye.
Naosen meiri le kariange, bameiri heile seiye
Banao meiri le baning ngammak, banao chwan le phun ngammak ke.
Theilan rujong di hwei ongme banu dingle
Bachu theimak rujong di inphut ongme bapa meng saan ga.
Kwabaan swak makko achwan barui tamga ongbi
Kwazin le hung mak dingo basak maak ongnu ashung riangre langle.
Bakaan nangle kariangnu maak dinge bakhwa heichan.
Ngak ongnu kabaan kum pithango alaang le katoile, suang ongme baram Tasuang dingle.
Anu dikou lan bina abaan maakrwe hei talei bilang Anao makka.
Hale bathan thanga, Damnupa nangle sia lai ye.
Apa dikou ongle kasakatak ngam lan bamei kasia kaluang bina thou.
Kalah louzam na a-innmuan to, Banim basa na alaa katak ong, amikthi na ariangret katak to.
Ngam lanrwe akum sia ga.
Amouh rwanle kadai kouse ong, inkam ongnu akombi hung.
Anu-Nou katwei sialai ye abaanrwan lang tangga.
Kapa-thun na basa-basik to ongnu akum,
Theimak dingo kama baan kasarwan karo kumbi.
Kamaang raan sia hunge di akachi puriak le maak, alampui na achongpuk to ong.
Anu kathaa hung thango atingle kaluangse lang nariak kasabi,
Katwei maaknu, kachi rou maaknu napam bile eihung zala nuzong? Kama Anu wo...
Inmuan Tangaak Katang kalompui se ongbi alou thingthak, louhoon na abaan to,
Balouh thaisun le sutsok kachiye abaanrwan muthang lang banang.
Banam hungding nudan louchun thirang kabin hungbi Anu barim le.
Takaan Sandung hungbi Baraang kamei kasa tonna suk su kaluang ongbi,
Abaan maakka puansoi-ran kalat ka bakoom la suk kadengse.
Hung thango Anu akung bile nasa hweichat mak ongbi
Anu wo... ameiri le raithang basia lang mi maak,
Amikthi le nunkhun thanglang le maakka.
Pam tuga ponthang sianu hei talei kasia bi?
Kariangnu thot, kariangnu chuan, kariangnu meiri, kariangnu laa, kariangnu kariang phunhung thango kama Anu nating hwei ye.
Oh, tangaaknu meiri heiya phun ngam maknu meiri,
Ngai pem lanu laa to ong sia rwe.
Kabaang tang dingo Tangaaknu laa Banu tonu kama Anu dikou ong khou.
