API ZULOU

Hungo hungo! Api zulou kou riak bi

Inmuan patso le hungo, karaanmi le hung ja e.

Tangaak swanrwan le hung karung ongbi

Naosen doi le hungo, bajinrwan le hung ja e.

Kasem swak dingro tangaak swanrwan khou na,

Chamdaan ongnu Api zulou thaisaak

Patso rwan lang rui khuangket balaan no,

Naosen doi lang bek phathang ngo.

Apu le api lang zu natnu lei thang bi o,

Naosen doi lang le kathaak dainu kasem thang bi o.

Hungo karo bangam thourijo api zulou sathou bi ga.

Hungo naosen rwan api riakla kama meiri rai ongme

Patso rwan le kadoi ongre Chong kasa chamlang.

Bajinrwan le Cham kasanu phunhung thange,

Hungo! Tangaakbwarwan le, nani lang hung dinu chongchat le to ongme.

Apu nale taluan luanchui ongre, batak meiri le ngai ongme.

Katangswanrwan le akung bi hungo kou ongme,

Karaan laam khatle bangui laa bachu thangne di.

Api zulou kou bi hungnu bingna kasia banim ga kasa loulu kapaang dingo,

Kama meiri le thei thang, intun chonglaa le ngaisu,

Hung katinu thou le baningsu daanne.

Hunglat dingnu basaam Zulou bina karung latlang 

Api na kanoi e........


                     M. Riamroi


*Kama lung thou kaanbi Takaan zulou diga tu hung ngaakke.
Bakung tuga patso katampi doi na bacham chamdaan thanga karung hunge.
Habei lang katampi khatle naosen rwan na karo ga hungmak angnu kaanbina basaamga kasapot khatle Kain zu chamdaan thanga hung karunge.
Thaisaak na loinu tumak ka, inmuan shungcham Lang kaso thange, naosen Lang lamjei Sanu bachu thange, namnai bajinrwan dingle takhuang to we, kasia sok katinu ding bathem mut sat thange, mou kasa le ngai kale thange.
Katei katei baje nuchong saga lousu thange Api Zulou hung suisu nubing na.




🤗

NGAM RUBO NANGJO?

Kama kataknu lungmuan anu Chung bina kahou we.

Kama kataknu ngam Apa kutpuang bina lousu we.

Naosen kum heiya sai, karowe,
Ngam rubo heikum ding bathan satka

Kachi rounu maakka inkhun pam bija,
Ngam rubo kapaang thanga (thouchwan) baan kasa khou.

Shungtam chuntu le baraan nong Nu bathem Satna
Ngam rubo nu ding inpaan thanga seswak lang.

Nachong ngam ga se ong, Pa na nungbi kapho tothanga
Ngam rubo natha natka bajuang satlang kapho dingjo.

Naosen meirilui raiga banui ngang onge
Ngam rubo nabaan than jongse riakpaan la.

Nalu le nakong jaangga juangse Pa ngam-sa na
Ngam rubo pa chuan rit phung hung langjo.

Thahou saga nain hanhung onge nu chuan lum, kadou sabi
Ngam rubo nu kariang le chuan napam bilang.

Babwa kum to athemrwan in kalengse maipaan ga
Ngam rubo nabaan jo nakum rai langjo.

Nanu le pa khou nashung thangga lung hung,
Ngam rubo nasa nakhou lumsa onglang jo.

Inkhun chun jo, nasa chun jo, khang chun jo
Ngam rubo phun hunglang barit bajaang khai makka.

Pa le nu ding kasan ongbi jo rithoi lian sai
Ngam rubo nasa rwan kasan pithang langjo rithoi ga.

Nanu le pa nalaang chuan saga lung thang,
Ngam rubo chuan kasa nasa rwan langjo.

Patso meiri sai, Batak meiri le ngainuam lan mak
Ngam rubo nakin sarwan langjo raithang biow dibi.

Naosen kajon ne Patso naosen kasan sakhou,
Ngam rubo naosen kasan jon onglang napam bile.

Babwa kum rin ngam maknu sat le siat,
Ngam rubo bathan satka patso kum(thot) thangka langjo.

Chuan sat ding khangna rai seye le chuansiat ding kiamse onge
Ngam rubo heibing dingjo nachuan nung suichui ga.

Naraan sat ding bajinserwan na puse ongnu dan
Ngam rubo nason le raise ongding nule.

Nachuan sat le siat nanu le pa na phunhung onge
Ngam rubo nasa chuan bing phunluak onglang jo.

Patso naosen pamak, ngamthit, sonthit, rithit, mithit thi onge
Ngam rubo thit pa makka dong langjo.

Ngai ongme bachong kaang sanu le to ongme balaa kaba sanu
Ngam rubo nachong le nalaa pirai pito ong lang le.

Senuam male sekatta le se ongme, banim ongmang bina le
Ngam rubo seswak lang jo baningmaak nuram la.

Se ngammak kale hanhung lat ongme Rikatha tuluga le
Ngam rubo nang jo bariak setang lang.

Ngam makke dijo pam tusoi thangbia ?

Ngam makke dibi pam tutang mak ang rujong?

Ngam makke dibi inton pam tu ongmang jong?

Ngam makke dijo naraan sianu tuthang siabia?

Ngam makke dijo nachong sathou mang diajong?

Ngam makke dibi meiri kasa raithang lat ne jong?

Ngam makke dijo naosen kum tulat wei nuam mai jong?

Ngam makke dibi nanu le pa rithoi loumak ang jong?

Ngam makke dijo patso takhwang lou lat mang jong?

Ngam makke dibi nabaan nu le pa dingjo tak tomak nujong?

Ngam makke dijo nachuan siat khangna rai lang banang jong?

Ngam makke dibi nabaan rwan ding bachamsia thang dia jong?

Ngam makke dijo nakum kathan onn lat nuam ma jong?

Ngam makke dibi nachuan salai mang dia jong?

Ngam makke dijo nang lung theimak ang bia jong?

Ngam makke dibi nang pam tumang jong?

Ngam makke dijo inpha na ngam mang nu jong?

Aka ngam lang intun ngamchuan tuthou rijo.
Achia chuan siat intun theithang jo,
Thei thang rijo kale ngam lang.
Achia chuansat intun banim makko.
Intun chuansat aka banim makjo.
Aka chuansat lang intun baning ongjo.
Kangam nu ngam na ngam thang rijo
Khatsanu nikum ding
He.




               M. Riamroi


*We have one and only life
  We have but good and bad thoughts
  We have but we made them hard.
  We have to but leave those every negative thought and work.
  We need to present good in this present.

Add caption