AMAAK INNKHAN PONNU -I

🌄Louthwan khat Amaak bameng tuwa Kriangamba, ding kaluang seye. Bamaijui na Tangaak phaang kadou rouga ong nge. Samlai bacham sebi rinne ei ane zingfa tangaak khat bathem langre ditainkhin lat peipei onge. Kanikhat tuding bia jongbo dia Anaoba, meng tuwa Sajokba le arwei taak lutte, inthem chaakla Kathweitangaak-innbi lukham innu wa ye diye. Sare dia arwei na bakaan sanu khat phaanglo bakaan jong ngakke.

Bavaan nu meng tuwa Sathiamlu(Anempi Tangaak-inn bi thotjaiphunnu mannu) ding pikalam pui thanglang kabia ye, dita Amaak ba maijui dom da sothangnu habakaan hung tanglang rouga kadunongrwe. Amaak jo Sathiamlu ding ei pam kabia lo kadou meirirailangbo di ngai ongme, barwei bakaan khwasei talen hungre katakkale ongga.

Takaan-pha takhwan bajaang kabin ririnu bi barwei lang chamdaanthangre (bariak na Changkrakalok tambou). Bakaan naihung mitAmaak ung inpaan thou mit mit ongnu murwe, Chamdaan thangnuTangaaknu meng tuwa Bareisalu ba Kathwei tangaak-innbi nakamsok na rwe. Anaoba le Sathiamlu le anina ongro diga seswakdrwe 

Amaak ding katun thang basia luga.

Inswan lam Ani loulampui bi kadou bacham latrwe. Sathiamlu nanuam ga ngairwe Kriangambo injaan takhwan pampam chong kabianurwa? Pampam ngai thoubo, Pam tulamnu rwa, jathang nurubonangna ngailang tuongnu chong nga?

Amaak chong katak lanrwe, Anaoba na bachungbi kachumme, nangba pamtu nubo jo chongle katak mak, Bareisalu ding ei Bathainu we dita ei baning lan lamre di katakke.

Ani pathum theimakka phaang kadou kale rwe chongmaakka. Oh eirinlanre dita Sathiamlu maihwan eimu rwe.

Eile Bareisalu om langbi kabia lanrwe, Sajokba le ngai lanre, dita arwei sungbi khat murwe diya Kriangamba le kadou bathin kajak ririongrwe, Bareisalu om langbi le kabia lanre kama den........

Kanikhat Anaoba le arwei kama domlo Kapan Tambou bi ba ongakongnu kaanbi nungla Amaak bakiat bana ye dia phaang kanei ba taSathiamlu le barwei banuijumjum bana rwe. Arwei le bahap ta kalega Barwei ding pise kama thou darwe chwan khat amlangputhangsia luga.

Louthook khwa bari nimnim hung lat narwe.

Thingbwa🌱 le batin sokna-e, Chakkne le basou diow ongrwe.

Ramru sabi Pengpa🐦 na inbaopaan🌸 bi twaang ga kabaang ongmelouserwan ding kadou thangnu laa den.

Naosenrwan👬👫 indop bi kuut-kuut tu ongnu dingle phaang muwe,tuikhun tuipit-in le banim ruru ongrwe.

Bakhiangbwa🌿🌾 thiaklo luthoop kathin ongnu tarai, Sao sat ongnu tarai, Moan tu ongnu tarai.

Aparwan nale Baji ten thiat ongnu ding naosenrwan na Khweitong sattao dia ngenkwat ongnu muwe.

Inn kaki bile anga doirwan Moo tu ongnu denne banu Bajirui jemna.

Kama kataknu khwatui🌩🌧 Amaak Kriangamba lange diga Anaoba le arwei rai onge.

Bareisalu le bakum kathan kasanu bacha tre. Balaangle Lahtu-kanoiongrwe, Sathiamlu le Thaisun lianna, kalim suchuilo phunghungdarwe.

Intun ba Sathiamlu le Kriangamba om bakaan ne diga le taluantuwe.

Dakdak ka Apu om Thoong bi na Batru🐥🐥 kani dem hungrwe, eile banim nuam makka Anaoba le Amaak le Sathiamlu le digasakarung lang chamdaan rwe.

Balouh thoubi Apu na Sathiamlu le Kriangamba ding Sungram💑tulang narwei bagek tanuwe diga bathunbi raithang lame.

Barwei katak makke dita Anaoba na taluan pei diga Tataak thakathan soklat bijo Sathiamlu le Amaak Kriangamba dingjo thabaankasa thwei bi pihung karung langrwe di rinsok re. Amaak ba thiapthiaplo babuthengbi phaang ongrwe dita alame ba basung lousudarwe, Sathiamlu na le kajakke adi kabiamakko arwei Sungramlang baje ngaakne dita arwei kariangmaknu joi diye ditabamaikhwan le musok loi darwe.

Apu na barwei Risamchui dingro diga thoithang luga soklat re.

Rarou tabi le Louduang sebi le, Loupuimai bile Louru bile, 

Thaamsak la hungmai bile Loudop la tamai bile, Loumaa jukai bileLounoong balouh taang bile Bacham ongrwe.

Kaloom rwan nale chongkhat bavaanrwan kanabi bathon ongnu le muwe,

Banu rwanle Thaisun kasem kale ongrwe.

Haba lang bakaan hung rwe, Halu meiri le loihungrwe.

🌒Tataak tha inbuu nu babaan thwei bi Amaak Anempi Tangaak-innbi Innkhan pon lang thou darwe.

  ......to bi continue........

                                     M. Riamroi