BANINGRUAN KAMA LE EI

Baning daan, baning han, baning kaloi seye,
Baning sok, baning ta, baning hung nge.
Apu meiri ngaiye, api laa le ngai seye.
Awa laam phaang nge, anao chwan suito seye
Apa kraan muwe, Anu kriang theiye.
Aram kapan tippe , Aram lungsom Lianne.
Aram takaan kabi sundung nge, Julou muliang nge.
Aram tataak sok bi naosen lang luk tuwe, thingkalwang le hung Kai latte
Aram kapanthwei kaam talat bijo, khusa laa na nungma kwat bacham se.
Aram taram baat thoulat bijo, meilam saga meipwang hung nge.
Aram tachi tapaan talat bijo, banounu babwa babaan pamak sing kahen ong.
Aram katang tangaak kaloom se, bamah theimak balaa kasa na kalwang ong.
Aram louthook sunpha pamak balaa kasa pwak kachan ong.
Bajuboon ding kasan na, kaliannu bathaisun ding bachun na aram tambou bijo.
Aram loujam sambaan tampaang den,
Aram tangaak swanrwan khaonam kailo inmuan tuikhun kajangse,
Banung la batin se ongnu katang swanrwan.
Aram kathang katang inn ma kathwei tangaak inn na lumme.
Aram kathwei katang inn ma kathang katang om thingpot Lianne.
Aram louthwan inmuan Naosen bafa bengse, takhwan inmuan tangaak ding phaang bari.
Aram haba pa sakaraang phunhung bijo Naosen baruksii khaise nuding Awa na phaang bakum ongme.
Aram Bakaan-inn hungtu bijo, tangaak laa bachamnu ding banao kajak riri ngak ong.
Aram sampei inn ka bijo, bathai baat lanrwe.
Ai sanu banne, Bajan tong sip ongbi.

    to be continue.......